کچھ کتابیں

چہل چراغ

کچھ کتابیں جنہیں تا دیر نہیں پڑھ پایا
مجھ سے ناراض, خفا, طیش بھری بیٹھی ہیں
گرد تا گرد اَٹی, دھول بھری بیٹھی ہیں
میرے کمرے میں ہر اک سمت بپا ہے اک شور
ہجر کا, وصل کا, آغاز کا, انجام کا شور
استعارات یا تشبیہ و کنایات کا شور
کسی افسانے, سفر نامے کی اصناف کا شور
پیش رس کا, کسی مکتوب کے الفاظ کا شور
نظم کا, نثر کا, تقریر کا, تحریر کا شور
عقل اور عشق کا یا زلف گرہ گیر کا شور
آپ بیتی کا, جہاں بیتی کا, تعزیر کا شور
خون میں ڈوبی کھنکتی کسی زنجیر کا شور
شوق تشہیر کا، تنقید کا، تشکیک کا شور
بھولی بسری کسی تاریخ کا , تحقیق کا شور
فلسفے کا, کسی مذہب کا, مناجات کا شور
شعر و شاعر کا, مؤرخ کا, مؤلف کا شور
شور منطق کا, دلائل, سبب اسباب کا شور
شہرت و نام و نسب, نامی و گمنام کا شور

میں کہ تنہا سرِ ھنگام۔۔۔ اٹھا ہے اک شور
میرے کمرے میں ہر اک سمت بپا ہے اک شور

کیسے سمجھاؤں کتابوں کو مری جان کہ اب
لب سئیے بیٹھی رہو, چپ رہو, خاموش رہو
لب سلے ہوں۔۔۔۔ تو اجازت ہے یہاں جینے کی
قبل اسکے۔۔۔۔ تمھیں پھاڑا یا جلایا جائے
آگہی دفن کرو, دھول بھری بیٹھی رہیں
آگہی دامِ شنیدن۔۔۔ اسد اللہ کی بات
آگہی۔۔۔۔۔ملک خداداد میں تاریک سی رات

آگہی۔۔۔ "فکر" کو "گستاخ" بنا دیتی ہے
آگہی۔۔۔ "فرد" کو "غدار" بنا دیتی ہے

میرے سمجھانے پہ خاموش ہوئی جاتی ہیں
کچھ کتابیں جنہیں تا دیر نہیں پڑھ پایا

کامران نفیس