اِک سجن ہوندا سی
پھگن چیت بہاراں ورگا
انب تے سیب اناراں ورگا
صاحب تے سرکاراں ورگا
ہفتے تے اتواراں ورگا
اِک سجن ہوندا سی
مکھن دُدھ ملائیاں ورگا
ٹانگر گچک خطائیاں ورگا
برفی، کھنڈ مٹھائیاں ورگا
سندھو نیک کمائیاں ورگا
اِک سجن ہوندا سی
تِکھا تیز شراباں ورگا
رنگ تے روپ نواباں ورگا
سُچا پُھل گُلاباں ورگا
پِچھلی رات دے خاباں ورگا
اِک سجن ہوندا سی
مِٹھیاں مِٹھیاں باتاں ورگا
چیت وساکھو راتاں ورگا
پیار دیاں سوغاتاں ورگا
عیداں تے شبراتاں ورگا
Comments
Post a Comment