غزل

آپ ہیرا ، صدف ، نگیں ، کیوں ہیں

آپ بے انتہا حسیں ، کیوں ہیں

آپ کی کاکلوں کے جنگل میں

اتنی موسیقیاں ، مکیں کیوں ہیں

چاند خود بھی نہیں سمجھ پایا

آپ اس درجہ مہ جبیں ، کیوں ہیں

شمس حیراں ہے ، آپ کے عارض

پھول ہو کر بھی ، آتشیں کیوں ہیں

آپ اتنے دروغ گو ہو کر

اس قدر قابلِ یقیں ، کیوں ہیں

شاعروں کے دلوں پہ آپ چلیں

گامزن ، برسرِ زمیں ، کیوں ہیں

جتنے بے رحم دلربا ہیں ، عدم

اتنے محبوب ، دلنشیں ، کیوں ہیں !! 

عبدالحمید عدم